Tamil Nadu Day 2026
Tamil Nadu Day 2026: A grand celebration in Chennai tomorrow – Government to award 76 Tamil scholars!
சென்னை: தமிழ்நாடு உருவாக்கப்பட்ட 1956ஆம் ஆண்டு நவம்பர் 1ஆம் தேதியை நினைவுகூரும் வகையில் நாளை (நவம்பர் 1) தமிழ்நாடு நாள் விழா கொண்டாடப்பட உள்ளது.
தமிழ் வளர்ச்சித் துறை சார்பில் சென்னையில் உள்ள அருங்காட்சியக அரங்கில் காலை 10 மணிக்கு விழா நடைபெற உள்ளது.
76 தமிழறிஞர்களுக்கு விருதுகள்
இந்த விழாவில் பள்ளிக்கல்வி, தமிழ் வளர்ச்சி, செய்தி மற்றும் விளம்பரத் துறை அமைச்சர் ராஜ்மோகன் பங்கேற்று பல்வேறு விருதுகளையும் நலத்திட்ட உதவிகளையும் வழங்க உள்ளார்.
* 76 தமிழறிஞர்களுக்கு தமிழ் செம்மல் விருதுகள் வழங்கப்பட உள்ளன.
* திருக்குறள் முற்றோதல் செய்த 179 மாணவர்களுக்கு பரிசுத்தொகை மற்றும் பாராட்டுச் சான்றிதழ்கள் வழங்கப்பட உள்ளன.
* ஐந்து தமிழறிஞர்களின் நூல்களை நாட்டுடைமையாக்கியதற்கான நூலுரிமைத் தொகை வழங்கப்பட உள்ளது.
தமிழகத்தின் வரலாற்றுப் பின்னணி
1956ஆம் ஆண்டு நவம்பர் 1ஆம் தேதி மொழிவாரி மாநிலங்கள் மறுசீரமைப்பின் அடிப்படையில் அன்றைய மதராஸ் மாநிலம் உருவானது. பின்னர் 1967ஆம் ஆண்டு ஜூலை 18ஆம் தேதி சட்டப்பேரவையில் மதராஸ் மாநிலத்தைத் தமிழ்நாடு எனப் பெயர் மாற்றம் செய்வதற்கான தீர்மானம் நிறைவேற்றப்பட்டது.
இந்நிலையில், 2026ஆம் ஆண்டு முதல் நவம்பர் 1 மற்றும் ஜூலை 18 ஆகிய இரண்டு நாட்களிலும் தமிழ்நாடு நாள் கொண்டாடப்படும் என முதலமைச்சர் அறிவித்துள்ளார்.
கலை நிகழ்ச்சிகள் மற்றும் போட்டிகள்
தமிழகத்தின் பாரம்பரியக் கலைகளைப் போற்றும் வகையில் சென்னை மாநகராட்சி பூங்காக்களில் நாட்டுப்புறக் கலை நிகழ்ச்சிகள் நடைபெற உள்ளன. கல்லூரி மாணவர்களுக்காக மாநில மற்றும் மாவட்ட அளவில் பேச்சு, கட்டுரைப் போட்டிகளும் நடத்தப்பட உள்ளன.
தமிழர்களின் மொழி, பண்பாடு, பாரம்பரியம் மற்றும் மாநிலத்தின் வரலாற்றைப் போற்றும் இந்த விழாவை முன்னிட்டு பொதுமக்களிடையே எதிர்பார்ப்பு ஏற்பட்டுள்ளது.